观鸟学“闽南话”，还我台湾鸟仔的本名（转）

mars厦大绿野

各种鸟类的闽南语俗语名字，有些还挺难的，我这个闽南话八级的都不懂：http://tieba.baidu.com/f?kz=901072324

mars厦大绿野

还我台湾鸟仔的本名
*萧平治*


话头
　　人讲「行不改姓，坐不改名」， 姓是父母所赐，只有来源，无好bai2 差别，姓，若是无特殊原因，是无容允别人ka7 咱改换，改姓是天大地大e5 代志；名e5 称号大部分是父母公祖所号，为著尊重序大，大多数e5 人拢m7 敢换名，只好等到大人即阁家己号名，为著雅气嘛好，为著命理嘛好，总是有伊改名换名e5 理由kap 自由，可见名姓对人尊严e5 重要性。朋友！你姓啥、你叫啥物名，你e5 名姓ti7 你e5 一生中间敢bat发生过问题？
　　这实在嘛问了chiaN5 奇怪，逐e5 人e5 名姓应该kap Siau,Lah-jih 仝一样，免想嘛知无问题，拢是toe3 父母姓，拢是父母所号e5 名，哪有啥thang 怀疑，无论汉名、户口名、本名、囡仔名，抑是偏名、外号，若m7 是父母所号，家己合意，啥人会kap 家己e5 姓名会be7 清，ko5-ko5 缠？
　　萧平治，Siau,Lah-jih ，这是我e5 户口名kap 本名，同窗- -e5 kap 社会朋友叫我萧平治，厝里父母兄弟姊妹，庄里亲堂，囡仔伴，kap 上知己e5 老兄弟，拢叫我Lah-jih 。细汉少年时，若有外位e5 朋友同学来相chhoe7 ，讲beh chhoe7 萧平治，定著三问四问无人bat 伊，著爱阁问伊是啥物人e5 囝儿？chit -ma2 leh 创啥物？chiah 知影是leh chhoe7 Siau,Lah-jih ，若无kan-na7 问beh chhoe7 萧平治，做你问kui 晡，抑是无人bat 伊。m7-ku2 你若直接讲beh chhoe7 「Lah-jih - -e5」，大概kui 庄内e5 大大细细无人m7 -bat 伊，免问第二摆就有人chhoa7 你chhoe7 著伊。
　　语言是文化e5 根本，文字是记录语言e5 符号，萧平治kap Siau,Lah-jih 哪会去hou7人分离，原因是嘴讲- - e5 kap 文字所显示- - e5 无仝音字，讲歹听，有淡薄仔put-tap-put-chhit （不答不七），我姓萧，无m7 著，ti7 汉文化e5 传统内，toe3老父e5 姓是天经地义，有唐山公，无唐山妈e5 悲情，敢讲咱平埔族妈e7 原味，煞hou7 咱放be7 记得，m7-chiah 留落来e5 话语，讲.有leh 讲，chiaN5 做文字煞piN3-chiaN5 无道理，借音借意借kah 不答不七，因为除了唐山公e5 汉字以外，若无lam7 用罗马字，就无法度thang 写kah chiaN5 顺序，长久以来，只有汉字北京语教育e5 结果，台湾人家己e5 语、文自按呢拆分开。
　　就是chit-e5 关系，台湾鸟仔名嘛kap 咱仝款运命，仝款lian5-hoe5 ，根据周镇先生e5 讲法，百年来，台湾鸟仔名，受著三摆e5 糟躂，第一摆ti7 1937~1945年代，日本人e5 非常时期，为著推展In-e5 「皇民化运动」kap 「国语家庭」，台湾鸟仔e5 母语，台湾鸟仔e5 本地名，煞拢用日语发音，好佳哉日本人犹有一寡良心，对咱台湾鸟e5 特有种，亲像「￠-chhiu，ka-leng7，hoe-bi5 」拢照台语音用『假名』翻译。上盖be7 o-lo2 - - tit e5 就是终战后e5 『国语』 运动，m7 但母语hou7 人压迫，连续台湾鸟仔名嘛彻底改名换姓，m7 是ui3 日语翻译做「日义汉字名」，就是中译外来名，上悲哀是，台湾正港e5 传统鸟仔名，拢总放sak m7 用，甘愿采用外来名，就是m7叫咱家己祖公祖妈留- - 落来e5 名字，乌鶖已经m7 是￠-chhiu，叫做『大卷尾』 ，花眉m7 是hoe-bi5 ，是『画眉』。解严10 外冬，台湾鸟仔e5 本名仝款无受重视，罕得tang 时会冻ti7 报纸杂志看著台湾鸟仔e5 本地名，煞hou7 人keng-the2 做「土名」，在地鸟hou7 人看轻做土鸟，在地人m7 煞hou7 人看做「土人」，本土化e5 本质敢诚实按呢生？
　　第三摆就是最近e5 代志，由出版界偷渡中国鸟名来咱台湾，目前已经有46种e5 鸟仔名已经hou7 人统一，可怜e5 代志，外来化- - e5 外来化，hou7 人统一- - e5 hou7 人统一，今taN ，台湾e5 爱鸟人，大多数已经m7 知影台湾鸟仔e5 本名kap 本名e5 意思ti7-toeh ，可叹！可悲！真正hiau-heng7 兼lian5-hoe5 。为啥物？为啥物？解严后台湾本土化e5 口号喝kah chiah 大声，对台湾鸟e5 母语却m7 知影thang 保惜保持，除了无知以外，就是欠缺家己e5 自信、自觉kap 爱家己文化e5 良知。
　　还我台湾鸟仔e5 本地名，生是台湾人，死beh 做台湾鬼，台湾话，台湾语，台湾e5乡土代志，拢m7-thang be7 记tit ，台湾鸟仔e5 本地名beh 爱流传，kan-na7 汉字无够，tioh8-ai3 用罗马字sio-thau3 ，这是笔者参考chit 本「台湾乡土鸟志」e5 本意，对鸟仔有趣味e5 朋友，若是beh 了解卡济鸟仔e5 绍介，著爱看「台湾乡土鸟志」e5 本文kap 参考内底e5 相片。（2000.01.01）

mars厦大绿野

书写顺序： 台湾鸟仔名（Peh8-oe7-ji7 >汉字）＞中译名＞英文名＞绍介
　
一、鷿鷈科（pek-the kho ）：
001. Chui2-pi7-a2 （水避仔）＞小鷿鷈＞Little Grebe.：（参考相片）


大部分e5 水鸟仔，拄著危险就飞离水面避险，独独Chui2-pi7-a2 （水避仔）会晓藏入水内闪避危险。In 匿ti7 水草内抑是庐竹仔脚，伸出伊e5 嘴pe 喘气，等待天敌离开。

mars厦大绿野

二、鹈鹕科（the5-hou5 kho ）：
002. Pou3-te7-go5（布袋鹅）＞鹈鹕＞Phillippine Pelican.：（参考相片）

嘴真大kai5 ，嘴颔下有一个大kai5 袋仔，可大可小，所以叫做Pou3-te7-go5（布袋鹅）。是一种海鹅，俗名南凤鹅，ti7 台湾是真罕有e5 迷鸟。

mars厦大绿野

三、 鲣鸟科（kian-niau2 kho ）：
003.Hai2-ke-bo2 （海鸡母）＞白腹鲣鸟＞Brown Booby.：（参考相片）

Hai2-ke-bo2 （海鸡母）是有脚掌e5 海鸟，嘴长长尖尖像鸡嘴，所以号做海鸡母。

mars厦大绿野

四、鸬鹚科（lou5-chi5 kho ）：
004. Lou5- chi5 （鸬鹚）＞鸬鹚＞Common Cormorant.：（参考相片）

Lou5- chi5 （鸬鹚），ti7 台湾是普遍e5 冬候鸟，会晓藏水匿掠鱼仔。

mars厦大绿野

五、鹭科（lou7 kho ）：
005.Peh8-leng5-si（白翎鸶）＞白鹭＞Egret.：（参考相片）
因为有白色丝仔形e5 羽毛，才叫做白翎鸶，有大白翎鸶、中白翎鸶、唐白翎鸶e5 分别。
传统念谣：
「西北雨一直落，白翎鸶来赶路，盘山岭过溪河，chhoe7 无岫跋一倒，日头暗，beh怎样，土地公，土地婆，做好心，来?路。」
「白翎鸶担畚箕，担到溪仔墘，跋一倒，khioh 一圆，买公饼送大姨，大姨嫌无济，掠鸡仔来咒誓。」
「白鹭鸶，chhia 粪箕，车到溪仔墘，跋一倒，khioh 著二sian2 钱。 一sian2 俭起来好过年，一sian2 买饼送大姨。」
俗语：
「白翎鸶，飞入去胭脂巷，亦是白。」
「白翎鸶拚死食，亦无脚后肚仁。」

006.Peh8-leng5-si（白翎鸶）＞牛背鹭、黄头鹭＞Cattle Egret.：（参考相片）
黄头鹭、ti7 分类上kap 小白鹭 是无共款- -e5 ，常常歇ti7 牛脚脊 phiaN ，所以叫做牛背鹭，出现ti7 田园，作穑人leh 犁田时。

007.Hai2-khia7-a2 （海徛仔）＞苍鹭（chhong-lou7 ）＞Gray Heron.：（参考相片）
时常用一支脚徛- -leh，另外一支kiu ti7 腹肚下，所以叫Hai2-khia7-a2 （海徛仔）。将颔颈kiu 成 z 字形到肩胛头，而且用灵敏e5 眼力，等待腊物。

008.Chhan5-khiah-a2 （田缺仔）＞黄小鹭＞Chinese Little Bittern.：（参考相片）
时常出现ti7 水田里，特别ti7 田岸有缺隙e5 所在，因为田缺卡有鱼虾鰗鰡抑是水生生物thang 食。
Chhan5-khiah-a2 （田缺仔）ti7 水田中、草pho7 内liau5 水chhoe7 食，拢将颔颈kiu 成z 字形，所以ti7 宜兰人keng-the2 一个人kiu-kiu lun-lun ，行路瘾痀形，叫做Chhan5-khiah-a2 （田缺仔）。
　
009.am3 -kong （暗公）＞夜鹭＞Night Heron.：（参考相片）
am3 -kong （暗公）是日- -时歇困，暗时讨食e5 夜行性鸟类，嘛叫做暗公鸟抑是暗鹭。
暗公鸟是形容熬夜到三更半暝m7 困e5 人。
俗语：chiuN7 山，笠仔棕簑提来moa ；暗公吼落海，笠仔棕簑就来解。」
暗公鸟kap 白翎鸶小白鹭、牛背鹭，三者共同做白翎鸶穴（岫）。

mars厦大绿野

六、朱鹭科（chu-lou7 kho ）：
010. La7-poe 、la7-pe （挠[片不]、挠[片不]）＞黑面琵鹭（ou-bin7 pi5-lou7 ）＞Black-feced Spoonbill.：（参考相片）

La7-poe 、la7-pe e5 嘴扁扁阔阔长长，亲像饭匙，阁卡seng5 搅挠食物e5 蓖仔，kai3-seng5 船poe （船桨），ti7 宜兰嘛有人叫做扫鹅、饭匙鹅，chhoe7 食e5 时，ti7 水底用伊扁扁e5 嘴pe 扫来扫去。
目前全世界大约有600只，其中三分之二ui3 北方来台湾七股度冬。
注：陈明仁解说，在地人讲chit 款鸟仔e5 习性，ti7 海埔仔讨食，「捞- -一下，飞- -一下」，才叫做 la7-poe 。

mars厦大绿野

七、雁鸭科（gan7-ah kho ）：
011. Ia2-go5（野鹅）＞鸿雁＞Swan Goose.：（参考相片）
Ia2-go5（野鹅）是家鹅e5 原种，羽毛色泽花纹诚共款，嘴pe 略略仔卡长，无鹅公lu ，叫声嘛kap 家鹅共款，是罕有e5 冬候鸟。

012. Thiu2-ah （丑鸭）＞巴鸭＞Baikal Teal.：（参考相片）
公鸟e5 面形真seng5 做戏e5 小丑仔，是台湾罕有e5 迷鸟，暗时飞来田野、湿地、水池仔讨食，日- -时浮沈ti7 有水草e5 水池歇困。日本名叫巴鸭。

013. Chui2-phio5-a2 （水薸仔）＞小水鸭＞Teal.：（参考相片）
Chui2-phio5-a2 （水薸仔）是冬天徙来台湾歇寒e5 雁鸭类上普遍e5 一种，日- -时规千万只浮tiam3 水面歇困，kai3-seng5 水薸。

014. Chiam-boe2-a2 （尖尾仔）＞尖尾鸭、针尾鸭＞Pintail.：（参考相片）
公鸭e5 尾，中央有二片卡细卡长e5 羽毛，seng5 尖尾形，所以号做Chiam-boe2-a2 （尖尾仔）。

015. Kim-thau5-a2 （金头仔）＞野鸭、绿头鸭＞Mallard.：（参考相片）
公鸭e5 头kap 颔颈，有金金深绿色e5 羽毛，所以叫做金头仔，扑猎e5 人惯习用水鸭e5 名。Ti7 台湾m7 是普遍e5 冬候鸟。

016. Peh8-bak8-bai5-a2 （白目眉仔）＞白眉鸭＞Garganey.：（参考相片）
公水鸭有明显e5 白色目眉花纹羽毛，所以叫伊Peh8-bak8-bai5-a2 （白目眉仔），暗时讨食，日- -时歇困。

017. Thng-si5-a2 （汤匙仔）＞琵琶鸭、琵嘴鸭＞Shoveller.：（相片参考）
Thng-si5-a2 （汤匙仔）e5 公母鸭嘴形，拢像汤匙仔形。因为In e5 嘴阔阁扁，所以阁叫做大嘴pe 仔。

018. Oan-iuN （鸳鸯）＞鸳鸯＞Mandarin Duck.：（参考相片）
自古鸳鸯拢hou7 人比论做翁某恩爱e5 模范，其实包含鸳鸯在内e5 雁鸭类水鸟仔，一般虽然是一夫一妻制，不过chit-e5 翁某关系只限ti7 当年e5 生湠期间。所以比论非正式翁某是野鸳鸯会通，讲恩爱夫妻是鸳鸯就无通- - lo3 。

mars厦大绿野

八、 鹫鹰科（chiu7-eng kho ）：
019. Lai7-hioh8、Ba7-hioh8 （鶆鹞）＞老鹰、黑鸢（ou-ian ）＞Blak Kite.：（参考相片）
Lai7-hioh8、Ba7-hioh8 （鶆鹞），chit-ma2 ti7 台湾是罕有e5 留鸟。往过ui3 台湾头到台湾尾，自低海拔e5 山区、平洋到海边，拢有伊e5 脚迹，常常看伊ti7 半空中飞来飞去leh 觅鸡仔栽。
俗语：
「一只Lai7-hioh8 ，觅七里鸡仔。」「无罩鸡母，扑人Lai7-hioh8 。」
念谣：「Lai7-hioh8 、Lai7-hioh8 ，恁娘腹肚痛。我有ioh8 ，你无药。柑仔皮，柚仔叶。」
「Lai7-hioh8 、Lai7-hioh8 ，Lai7-hioh8 飞chiuN7 山，囡仔快做官。Lai7-hioh8 飞悬悬，囡仔中状元。Lai7-hioh8 飞低低，囡仔快做父。」

020. Eng-a2-hou2 （鹰仔虎）＞松雀鹰（siong5-chhiok eng ）＞Besra sparrow Hark.：（参考相片）
Eng-a2-hou2 （鹰仔虎）是台湾猛禽留鸟，kan-na7 出现ti7 山区，鸟仔类是伊e5 主食，行为凶猛，有法度ti7 树林间追击飞鸟，甚至m7 惊乌鶖。
俗语：「鹰仔虎，惊死乌鶖。」「你真歹，像鹰仔虎。」

021. Hun2-chiau2-eng （粉鸟鹰）＞凤头苍鹰＞Formosan Crested Goshawk.：（参考相片）
性凶猛，是粉鸟e5 煞星，所以叫做粉鸟鹰，ti7 庄脚有人叫做斑鸽鹰、扑兔鹰、扑鸟鹰，kan-na7 出现ti7 山区，平洋地带，无伊e5 踪影。

022. Eng-thiau7-chiau2 （鹰柱鸟）＞赤腹鹰（chhiah-pak eng ）＞Chinese Goshawk.：（参考相片）
秋天ti7 南台湾过境，ti7 垦丁歇暝了后，天光日由四方绞倚来e5 族群，顺气流飞chiuN7 天顶，因为seh8 （旋）仝一e5 方向，煞形成kap 龙卷风仝款成做一支柱仔形，「鹰柱」奇观就是号名e5 原因。另外犹有「鹰河」「落鹰」「起鹰」e5 奇景。

023. Lam5-lou7-eng （南路鹰）＞灰面鹫（hoe-bin7-chiu7 ）、灰面鵟\鹰（hoe-bin7 kong5-eng ）＞Gray-faced Buzzard.：（参考相片）
每年十月经由南台湾满州乡，过境飞去东南亚避寒过冬；隔转年清明前后才阁飞倒转来。彰化八卦山kap大肚山台地是In 暂时e5 歇困站。彰化人叫In南路鹰。
俗语：
「南路鹰，每年一定转来哭清明。」有「清明鸟」e5 称呼。
「南路鹰，一万死九千。」八卦山、满州乡，自古以来就有tng 掠南路鹰，piak 鸟仔巴e5 歹习惯。
小说：南路鹰，一万死九千。（鹰扬八卦）<Siau,Lah-Jih>

024. Choa5-tiau（蛇雕）＞大冠鹫（toa7-koan-chiu7 ）＞Formosan Sarpent Eagle.：（参考相片）
heng3 食蛇类，蛇肉是伊e5 主食，是蛇类e5 克星，所以有蛇雕、蛇鹰e5 名。

025. Kak-eng （角鹰）＞南方角鹰、熊鹰（him5-eng ）＞Hawk Eagle.：（参考相片）
是当今台湾真罕有e5 猛禽留鸟(beng2-khim5 liu5-chiau2 )，罕罕- -a3 bat ti7 深山林内看著，因为头壳顶头有毛角，所以叫角鹰。